زمان

زمان الحياة كانت اسهل

كل شي كان على طبيعته

كان اللي يغيب نسأل عنه وينك؟

وايش فيك مختفي؟

ويحس هو بشعور حلولإهتمام جاره به

الحين والله اللي مايسأل عني بكيفه

وصرنا نبعد عن بعض أكثر

حتى واحنا محتاجين بعض !!!

نستنى كل واحد يدق باب الثاني

والنتيجه

تبعاد البشر حتى ظلت الأبواب مقفله!!!

كنا لما نطفش نطلع ،، للحوش أو للسطوح

وناخذ قهوتنا وشاهينا

وكم حبة كيت كات وبسكوت أبو رز ومعاه فش فاش

أو فشار واذا مافي هذا كله الله يخلي صحن التمره

ونتسلى ونفرفش ونرجع

واحنا بأفضل حال ونقول الله يازين الحياه

الحين لازم نسافر لاطفشنا

مايروح الطفش الغبي هذا إلا إذا سافرنا

وطلعنا ونرجع واحنا نقول أوووف مرررة طفش

سفر يجيب الهم

زمان كنا نجتمع بالسطوح

ونلعب حكم شيبه او كورة

او نطير طيارة الورق او مكشوف او منوبولي

او باصرة او كيرم او ضومنه

العاب بسيطه ماكانت تحتاج غير قلوب صافيه وصادقه

ونحس بسعاده مافي اجمل منها

والحين بلاي استيشن واجهزة ذكية

كل واحد ماسك جهازه لاروح لانبض ولا حتى حياة

مجتمعين لاكن بقلوب شتى

وزيادة كمان كثير علمتنا هالألعاب كيف تخرب أخلاقنا

زمان كانت الحياة بسيطة

كنا إذا نبغى نروح لجارتنا بملابس البيت نروح نزورها

وكل شي بسيط وسهل ومافي تكلف

والحين لا لازم نلبس ونتكشخ وكأننا رايحن وين !!

وهي من الصباح تطبخ وتنفخ وحلا وفطاير ووووو ،،، 

غصب صرنا نكره نزور بعض

تعب من هنا وتعب هناك

زمان كان الجار لابغى يشوف جيرانه عند الدكه

يفرش فرشته ويحط ثلاجة القهوة والشاي وصحن تمرة

ويالله حياكم الله ياجماعة الخير

وكانت البيبان حلوة

فيها حياة حقيقيه وكانت مفتوحة

الآن البيبان تزينت والدكات اختفت

والبشر ماعادوا هم البشر والبيبان تسكرت

زمان اولادنا كانو كلهم إخوان

إذا زعل واحد صاحبه والا ولد الجيران والا ولد عمه او ايا كان

الكل كان يقولهم عيب انتم أخوان !

والآن مين هو حتى يمد يده عليك

كسر راسه يارخمه

وتفرقو الأخوان وبات الكل غريب * غريب !!!...

زمان كان الكل يجتمعوا

عند الكبير سواء أب او أخ أو حتى قريب

وكانت النفوس حلوه

الآن لا ايش معنى هو وانا لا

الكل صار كبير ويوم صارت كل البشر كبار

راحت الأشياء الحلوة بالرجلين

زمان الكبير له قدره وهيبته ، له احترامه

لو نقدر نفرش له الأرض ورد

والحين صار الصغير يتطاول على الكبير

بحجة احترام الفكر وحرية وجهات النظر ،،،

وجتنا الحرية على طبق مقلوب

وضاعت الهيبة والوقار!!!

كثير أمور نفتقدها كانت زمان موجوده
التفاصيل الصغيره ، طبيعتنا ، قلوبنا
الأشياء اللي ماتحسسنا بتكلف
ولا حتى محتاجين نتعب عشان نوصل 

محتاجين نرجع زي زمان
والله العظيم محتاجين نرجع لكل شي بسيط ضاع بزحمة الحياة
وفقدناه حتى فقدنا نفوسنا معاها ،،،

نبي حياتنا بدون بروتوكولات لاتودي ولا تجيب

 

~~~~~~~~~~~~~~~~~~~~~~~~~~~~~~~~